AA Nih Kawl Cozah Palik Ralring Peknak Cathluan Thar A Chuah

Arakan ramkulh chungah a ummi cozah palik pawl cu an tuanvo leng in a hlei hluat riantuan lo ding in AA hriamtlai phu nih nizan August 12 ni ralring peknak cathluan an chuak tiah theih a si.

Palik nih nan tuanvo leng in Arakan mipi tlaih in hrem lo ding, Palik sakhaan in ralkap hriam ngan kap bawmh lo ding, cun ramri hngak palik pawl nih AA le ralkap i dohnak ah i thlah ve lo ding ti bantuk ralring peknak cathluan a si tiah AA tuanvo ngeitu hna nih an chim.

AA in chimhnak nawl ngeitu Dr. Khaing Thukha nih “Palik hna nih an palik rian tuan loin Kawl cozah he fonh in mipi an hrem, mipi an namnek i an thah tbk phung ning lo rian an tuan i an tuanvo leng in an tuanmi kan hmuh. Cun tu kar hrawng cu palik sakhan cu Kawl ralkap caah bawmhchanhtu thabik ah an cang i palik sakhan in hriam ngan hna an kap piak. Khat lei in ramri hngak palik hna nih Kawl cozah he i bawmh in an kan tuk ve. Cucaah cu bantuk an tuahmi ngol ding le an tuanvo te an tuannak hnga ralring peknak cathluan kan chuah hi a si” tiah a chim.

AA hriamtlai hna nih hin an luancia February thla ahkhan tu bantukin palik pawl ralring an rak peknak cathluan an rak chuah bal cang.

Hi AA nih palik ralring peknak cathluan an chuakmi kong he pehtlaih in Arakan ramkulh Palik bawi Pyinehmu U Kyi Linn nih cun phung ning tein cunglei nih tuanvo an kan pekmi cu pehzulh in kan tuan ko lai a ti ve.

“Anmah te in an duhmi paoh tuah ko hna seh ca. Zeihmanh a poi lo. Kanmah cu upadi ning tein kan ram nih a kan pekmi tuanvo cu pehzulh in kan tuan ko lai” tiah a chim hi a si.

AA nih palik ralring peknak cathluan a chuahmi ahhin Palik rian a tuanmi Arakan miphun pawl hna nih AA cawlcanghnak hnahnawhnak pe khotu biachimh le thil tuah lo ding, cu bantuk a chim/tuahtu um ahcun a chimtu le a tuahtu nih tuanvo aa la lai (kan thah lai) tiah an langhter chih ti a si.

Cu pinah Kawl cozah ralkap pawl nih ralkap motor hmang ko loin palik motor, mipi motor, le China nih an pekmi China Aid pawl an hmang pinah ralkap nih palik uniform i hruk riangmang in khuami bawh le tlaih le an thilri chuh ti bantuk an tuah tiah ralring peknak cathluan ah an langhter chih tiah theih a si.

Source: DVB