Update: Kawlram Ti Lian Hnubik Dirhmun, Chin Ramkulh Zong Lei A Min Sual Lai Tiah Thinphung Dirhmun Ah A Um

Tu lio Kawlram ti lian cu tih nung a si ko. Kan hnu nihnih chungah Kawlram pumpi ah minung 12,000 nih an inn le lo kaltak in himnak an kawl i a tu cu minung 38,000 tiang nih himnak an kawlmi an phan cang tiah theih a si.

June thla dongh thawk in nihin ni tiang ti lian ruangah minung 105,000 leng nih an inn le lo, an um le kheng chuak tak in harnak an tong cang tiah theih a si. Cheukhat cu Kachin, Rakhine le Chin ramkulh hna ah ruati a tlawm deuh cang caah an inn lei an kir than cang tiah theih a si.

Tutan hi rua a tur tuk caah Mon ramkulh chung ti lian a zualhma khun i kan hnu nihnih chungah minung 7000 leng nih an inn le lo, bel le kheng kaltak in himnak an kawl tiah theih a si.

Myanmar Red Cross phu nih an chimh ning ah cun Paung myo ah rua a surtuk ruang le ti a lian tuk ruangah vawlei a min i minung 5 nunnak a liam tiah theih a si. Myone dangdang zongah inn cheukhat le sianginn cheukhat cu ti nih a la i a fenh hna pinah lam hman awk thaloin a phit dih tiah theih asi.

Cu pinah cheukhat khuapi khuate hna cu ti nih a khuh dih tiah an chim chap. Myanmar Red Cross phu hi nawlngeitu hna he vawlei min ruang le ti lian ruangah harnak a tongmi mipi bawmhchanhtu an si.

Tutan ti lian ruangah Karen ramkulh le Pago ramthen hna zong nih harnak an tong ve i Karen ramkulh ah minung 3300 leng le Pago ramthen ah minung 3700 leng nih an inn le lo, an um le kheng kaltak in himnak an kawl tiah theih a si.

Myanmar Red Cross phu, cu hmun i nawlngeitu hna, khuami mipi hna le NGO phu zong nih i bawmh in ti lian har tongmi hna caah biatak tein rian an tuan ve ti a si. An riantuan ning ahhin phaisa fang in bawmhnak pek, facang le ei ding dangdang in bawmhnak pek hna aa tel ti si.

Khuacaan zohthiam hna nih an kherhhlai ningah Chin ramkulh, Rakhine ramkulh, Karen ramkulh, Mon ramkulh le Tanithary ramthen hna ah rua ti a tam rih lai ti a si caah kanmah tlangcung um Chin miphun caah vawlei a min sual lai ti thinphang a si ko.

Source: BGT