Laimi Baibal Cawn Piak Tu Saya Hna Nih Nan Theihmi Nakin Nan Ngeihmi kha Kan Pe Deuh U. Cu Nak Hmanh In A Tha Deuh Rih Mi Cu—

Laimi cawn piaktu Saya hna nih Bible chung i min Peter, Timothy, Abraham, David tbt min tampi kan in ngeih hna. Lai Peter le Lai Pawl le Lai Jeim le David a dang dang tampi kan in ngeih hna.

Baibal chung i Min hna cu anmah pumpak in hmuhton mi le an nunnak ah Pathian aa phuannak kong kha an chim. Lai Peter le Lai David hna an nunnak ah tah Pathian aa phuang ve lo maw?

Kebei pa nih Peter kha zeite tal ka pe ve tuah tiah a hal. Peter cu catang ngei a si lo caah fimnak pek awk a ngei lo. Ngatlai in paw aa cawmmi a si caah chawva pek awk a ngei ve lo. Phaisa zeihmanh ka ngei lo a ti. Nain ka ngeihmi cu kan pek lai. Jesuh Krih Min kal tiah a ti. ( Jesuh cu Peter a nun lio ah a mit hrim in a hmuhmi mi fa pa kha a si i Krih cu thihnak in thawhter a si hnu ah a nunnak chungin a nunpiak tu kha a si. Jesuh le Krih an i lo lo. A thleidang thiam lo mi cawnpiaktu saya tampi an um).

Cucaah cawnpiaktu hna nih tuanbia nan theihmi nakin nan nunnak chungah Pathian aa phuannak le nan ngeihmi Krih kha tam deuh kan pe  u. Nan nunnak chungah aa phuangmi Krih na kan pekmi nak hmanh in Krih chungah luhnak lam kan cawn piak u law Krih chungah kan khumh deuh u.

Pathian nih zumtu mi hna vawlei kan nun chungah a sang bik le a donghnak bik a kan timh piakmi (Ultimate goal) cu “ Krih Cungah Nun” hi a si. Krih chungah cun Krih nih a kan nun piak caah vaivuan nak a um ti lo. Mi zong nih deh khawh a si ti lo. Holh theih le theih lo kong zong nih nih hna hnawhnak a pe kho lo. Pa le Fapa le Thiangthlara Min le Jesuh Min in tilpil innak kong zong  a cuai thlai thiam dih.

Krih chung i kan nunnak in khua hi kan cuanh ding a si. Krih chungah nun hi atulio zumtu ka ke lamhnak hmun a si. Krih chungah nun lo in phung na chim ahcun Baibal tuanbia lawng kha na chim lai i na ngeih lo mi pi cu na pek lengmang lai. Zeidah a tha hnem?