Khrihfa nih Eid al-Adha Timi Puai Hi Kan Cohlan Kho Lai Maw?

Muslim (Islam) biaknak hna nih an ngeihmi ni sunglawi lakah pakhat cu Eid al-Adha timi a si. Arabic holh in cun ” raithawinak puai” ti a si. Hi zarh hi August 21 ah thawk a si. Ni thum chung anmah Muslim nih an ulhmi puai ni sunglawi a si.

Vawleicung Muslim ramkip nih an ulhmi ni a si. Hi ni ah hin tuu hna cu an thah hna, mingei deuh nih pahnih tiin a hlan tein an inn an i hren cia cang.Hi ‘ raithawinak puai’ nih a langhtermi cu Abraham nih a fapa Isak Pathian sinah raithawinak a peknak kha anmah Muslim nih an ilak mi cu a si.

Asinain anmah Muslim Baibal ca Qur’an ahcun Isak si loin Abramham fapa upa deuh Ishmael tu kha Abraham nih Pathian sinah raithawinak a pekmi a si tiah an ti. Khrihfa Baibal ca chung ahcun Abraham nih Pathian sinah raithawinak a pekmi kha Ishmael si loin Isak tu a rak si.

Baibal tuanbia kan zoh tikah Muslim an chuahkeknak hi Ishmael hrin fale an si hna. Anmah Muslim nih cun Abraham nih fapa pakhat lawng a ngei i, Ishmael lawng si tihi an zumh. Abraham nih fapa pahnih a ngei hna timi hi an cohlan lo.

Zei caah tiah Cathiang chungah kan hmuhmi cu Abraham nih fapa pahnih a ngeih hna i pakhat cu salnu [Hagar] sinah a ngei i, pakhat cu miluat nu[Sarah] sinah a ngeih.

Zei caah tiah Hagar cu Arabia i a ummi Sinai Tlang kha a si i, amah fale cu sal an si. Cucaah Hagar fapa Ishmael cu biakam fa si loin salfa a si. Isak tu cu biakam fa a si caah kannih zong Isak bantukin biakam fale kan si.

Muslim nih an ngeihmi Eid al-Adha timi ‘raithawinak puai’ hi Khrifa mi kan zumhnak he cun aa ralkah taktak mi a si. Muslim nih cun Abraham kan pa an ti nain Abraham zumhnak tu cu an ihrawm kho lo.

Abraham nih a fapa Isak Pathian sinah raithawinak a peknak nih a langhter mi ‘Jesuh’ kha a si. Jesuh nih Cross cungah raithawinak a pek cu minung sualnak in khamh kha a si.

Muslim nih an ngeihmi hi puai hi cu Khrihfa mi nih cohlan awk a tha lomi puai a si. Cathiang nih a chim bangin ” kannih cu salnu fale si loin, miluat nu fale kan si” a ti. Amen!