Biaknak Phung Tang Ah Maw Na Nun? Krih Chungah Dah Na Nun?

Zu ri cu khor chungah a tlak ahcun amah he pahnih thum lawng a tlak pi chih khawh hna. Phung Chimtu nih pulpit cungin a tluk ahcun amah he a thongin a tluk pi khawh. Zuri cu zuthawl he a tluk ahcun a cawnpiak zia an thiam ahcun a thawh than a fawi. Phung chimtu cu Bible he Pulpit cungin a tluk ahcun ka palh ti kha amah le mah ai hmuh lo caah amah bia a zummi hna lila hmangin a tlu peng ko lai. Pulpit cung kai paoh thutdan san deuhnak hmun phak poah ah Pathian nih a ka cawisan tiah ruah ding a si lo. Mi tang dor dingin Pathian nih tangah a kan thlak mi a si deuh.
A zer tuk mi Satan nih a phun phun in a kan thlak i a kan tluk ter. Minung nih le kan khuaruah khawhnak a bi tuk. Upat awk a tlak lo mi minung, a hmun lo mi thilri men men hmang in minung hlen dingah Satan hi a hrut mi a si lo dakaw.
Minung lungtlin le lung thawhnak thil hnu lei in a control tu hi hodah a si?
Minung nih piakhat te thluak kan ngeihmi hmang in mi lungtlin awk le lung thawh awk men thil in pulpit cungin phung kan chim lengmang ahcun Pathian duhnak le Pathian lungthin he a pial kanh caah Krih chung i kan nunnak (maturity in Christ) ah kan thang kho lai lo.

Kan mit nih ai dawhnak a hmuh i kan hnakhaw nih aw thawng a theih. Nika ceunak nih vawlei cu a emh. Thli nih a tonmi paoh a chem a pah mi hna hi biatak an si. Biatak nih a tonghmi paoh cu phun dang cio in an tuar dih. Hmuh khawh mi thil hi hmuh khawh lo mi Thlarau rian tuannak a cawn piaktu an si. Cuve bantukin Thawngtha biatak nih cun a theitu a ngaitu minung lungthin kha a doh in a doh. Lung thawh nak men men (emotional) a si lo.
Pathian le minung a kan pehtlaihter ru cu biatak hi a si. Cu hnu cun Pathian he i chawnh biak peng mi nih kan i pehtlaihnak thahri kha a nunter. Cu thil pahnih kan pal dih hnu lawngah Pathian duhnak le lungthawhnak nih an peh zulh.

Cucaah lung thawhnak men men lawngte kan chim le kan ngaih ahcun a hmai i a ummi thil pa (2) Thawnghta biatak i a muru (essence) ah nun loin a phung men biaknak ah a nung mi kan si sual lai?
Krihfa timi cu biaknak a si lo. Biaknak timi cu an biakmi caah thiltha tiah an ruahmi an tuah. An biakmi sin ah an va panh. An biakmi caah rai thawinak rawl an dangh. An biakmi caah a herh ahcun an nunnak zong an i pe. Krihfa timi cu biaknak he a lettelam a si. Kan Bawipa Zisuh Krih tu nih a nunnak a kan pek. Amah tu nih a kan tuah piak dih. Amah tu nih kan sinah a kan panh. Thihnak thawhter a si hnu zongah zumtu kan nunnak chungin Krih tu nih a kan nun piak rih.
Biaknak phung tangah a um mi i a cawlcang mi maw kan si?  Krih chungah a nung mi dah kan si?

Credit: Salai Tin Maung Win