Pathian Nih Sunparnak Co Ko Seh Ti Nakin Pathian A Sunparnak Kan Hmuhnak Caah Si Ko Seh Ti Hi Biatak Deuh A Si.

Biakam Thar timi cu Mopa Krih le Monu zumtu mi hna karlak i hnatlaknak (Marrige Covenant) in sermi biakamnak a si. Krih Thlarau le zumtu thlarau kha hmunkhat (Union) ah an i fonh i nunnak pakhat (one life) kan i hrawm. Vailam ah a kan dawtnak a langhter lawng siloin thihnak in thawhter than a si hnu ah zumtu mi hna nunnak chungin Amah nunnak hrim kha a kan hrawmh. Hi a kan hrawmh hi a voi (2) nak a si. A voi (1) nak cu mipa a rak ser lio ahkhan a si. Mipa hnar chungah Pathian nih “Thaw” a chuah hnawh a ti. Pathian “Thaw” kha minung chungah a lut i Amah Sinak kha a kan hrawmh. Curuang ah minung vialte nih kan thlarau in Pathian kan hlam dih.

Cucaah Pathian dawtnak cu a thuk i a sang kan ti tikah zum lo tu vialte caah a fapa Jesuh kha pek kan si. Cu hnu ah zumtu vialte caah Krih a kan pek i Krih chungin Amah nunnak hrim kha a kan hrawmh. Amah Nunnak hrim kha hrawmh a kan duhtu Pathian a si.

Pathian nih minung hi vawlei kan nunchung a donghnak bik (ultimate goal) mi cu Krih chung ah nun hi a si. Krih chung kan nun tikah Krih Thlarau le minung cu an i fonh i Krih thatnak le thawnnak le sunparnak cu minung sinah a luang i cu hna cu minung nih a theipar in kan zun. Cu pei Pawl nih Krih thawngin zeizong vialte ka tei khawh a tinak kha a si.

Cucaah Pathian nih Amah sunparnak le thatnak le lian ngannak vialte kha minung nih co hna seh law cu an co mi sunparnak vialte cu midang nih hmuh hna seh ti kha a duh. Pathian nih minung sinin co awk samthia te hmanh a ngei lo. Pathian cu Amah tein a tlingcia mi a si. Cu a tlinnak cu minung nih zuk le chap piak a ngah lo. Zumtu tampi cu Pathian hi pek le bawmh kan timh lengmang. A ngah lo.

Pathian nih sunparnak co ko seh timi nakin Pathian a sunpar kan hmuhnak caah si ko seh tihi biatak a si deuh.