Pathian Rian Ka Tuan Ti Hi Toidor Nun Nakin Phorhlaw Nak Deuh A Si

Pathian nih mi fapa Jesuh hi khamtu ding ca lawng siloin kan i zoh chunh awk ah a kan pekmi a si. Baibal chung ceo ceo zongah Pawl le Peter Le Moses a dang dang pawl an chimmi nak zongin Jesuh nun le chimmi hi kan i tlaih deuh awk a si. Jesuh Krih nih mi fapa le Pathian Fapa  tiin Sinak  (Title ) pa (2) a ngei. Mi fapa Jesuh cu vawlei he aa pehtlai caah vawlei rian lawng a tuan. Pathian Fapa cu Vanlei he aa pehtlai mi a si caah Van rian, Pathian rian lawng a tuan ve. Cucaah amah Jesuh hrim nih mi rian tuan piak tu dingah ka ra a ti. A thlahtu cu Pa Pathian a si i a fialmi rian cu minung rian a si.

Mi fapa Jesuh nih minung rian a tuannak i a thil ti khawhnak tu cu a chungah a ummi Pathian fapa thawngin a si. Cucu Cathiang nih Pathian cu mi fapa thitsa (God manifested in the flesh) ah a lang a ti. Aa dang i sinak zong aa lo lo mi Pathian le minung rian tuanning thleidan thiam hi Thlarau mit au phunkhat a si.

Pathian cu Amah tein a tlingmi Pathian a si caah tuan piak ding rian a ngei lo. Zeicatiah minung menmen hrim nih cun a tuan in tuan piak khawh a si lo. A tling mi Pathian sinak kha minung nih kan chap kho lo. Zuh piak khawh zong a si lo. Pathian a tha kan timi hmanh khi kan chim ruangah Pathian cu a tha deuh kho hlei lo. A chia kan ti zong ah a chia kho hlei lo.

Patian thatnak kan nunnak chungah a hung luang i Pathian cu a that lawng siloin keimah zong a that ter ve tiah a theipar in kan zunmi tu kha Pathian nih minung sinah aa ruahchan mi a si. Cucaah Pathian a tha ti le Pathian ka caah a tha timi zong aa dang tuk.

Cucaah Pathian cu minung zawn lawng hi a kan ruat i minung rian tuan piak dingah a kan fial. Minung rian tuan piak tikah mi fapa Jesuh taksa ah Pathian aa phuan bantukin a tuantu cungah Pathian aa phuang ve lai. Mi fapa Jesuh bantuk kha si hna seh ti a kan duh caah Thiangthlarau a kan pek cu. Pathian rian ka tuan timi nakin Pathian nih a ka fialmi minung rian ka tuan timi hi toidor nun deuh a si. Pathian rian cu Amah Pathian lawng nih a tuan khawh.

Note: Pathian rian ka tuan a timi sual puh cu a si lo.