Oneness le Trinity Kong Ah debate An Tuah Tak Ahcun Teitu Cu Kan Ralpa Satan A Si Te Lai –

Nai thlakhat chung Laimi phung chimtu hna nih an chimmi le tulio ceihmi ka rel ve tikah a hmanmi lo ngai tung i a hman lo mi tete an um len rua tiah ka ruah. Soisel siloin minung kan si caah palhmi a um ko lai. Asinain Pathian bia chim cu a si khawh chungin ralrin a herh. A kan cawnpiak tu hna nih kei cu Saya ka si. A ngaitu cu sianghngak chia nan si ti lungput in chim ahcun ralrin loin palh a fawi te.

Jesuh nih amah le mah kha Pathian fapa ka si a ti bal lo. Mi nih hrinmi mi fapa ka si tiah a chim lengmang. Mi fapa Jesuh nih a nunchung mi cungah Saya a tuan lo i Saya lungput a ngei lo. Zumtu Pathian fa le kan nunnak chungah Thlaurau in a kan um pi tik zongah mi toi ah aa dor i bawmtu dirhmun in a kan um pi. Kei cu Pathian nannih cu minung tiah saya lungput a ngei lo. Saya lungput kan ngeih ahcun Bible cafang chungah aa thupmi Pathian biathli sullam hngalh kho lai lo.

Jesuh vawleicung a nun chung vialte a chungah aa thupmi Pathian thlarau a bia lawng kha a ngai i a tuah. Cucu Cathiang nih Pathian thawnnak minung Jesuh titsa ah a lang a ti. Cu nih a langhter mi cu Pathian cu chunglei in lenglei ah (inside out) rian a tuan. Satan cu a leng lei in chungah (outside in) luh aa tim.  Zumtu kan si hnu cun Lenglei buu tanhnak te hna, doctrine tanhnak te hna nakin kan chungin a kan nun piak tu Krih aw tu kan ngaih ahcun vaivuan ding le lung awtawm ding zeihmanh a um lo. Kha bantuk lenglei tanhnak a ngeimi an aw le dirhmun hmanh khi zei aw dah a si, zei holh dah a si ti kha Thlarau mit in fiang put in hmuh khawh a si.

Saya Lungput ngeih in phun dang in Lenglei tanhcia nak lungput ngeih buin oneness le trinity kong hi debate an tuah tahcun kan ralpa Satan tu aa lawm te lai. Satan tu teinak a hmuhter sual lai ti phan a um.